香港。尋食
【必吃】青衣戲棚真君誕2016 ｜ 夜市小食特色小食搶先看～
22:49:00
早幾日望出去見佢已經搭好哂棚，我亦都唔執輸即刻問下幾時又有夜市！原來就係今日啦～ 由4月18日（星期一）起至4月22日（星期五）一連五日，市民又可以去青衣夜市食到盡啦！咁當然啦，其實我都唔係好想咁多人同我爭野食，所以決定第一日身先士卒去望完食完先介紹比大家～
去過既朋友仔都應該唔陌生咖啦，搭地鐵到青衣C出口，跟著人龍行都包你搵到！所以都係去下相話比大家知有咩食，做好準備先去啊！記得帶定紙巾、濕紙巾、噴定蚊怕水啦～ 加上最近天氣都幾熱下，場內又好多串燒熟食檔，如果唔係住得近，可以拎番上屋企開住冷氣食既朋友（例如我），就都係著得清爽啲好啦，頭髮最好就扎起啦，唔係一個唔小心人多比後面串串燒嗨到就欲哭無淚啦！
一行入去已經見到一大堆懷舊小食啊、玩具、涼茶，唔歡喜懷舊的話再行入啲亦都大把台式、韓式、原創小食等緊你。
本身諗住話臨走買十蚊花生上樓剝下，竟然唔記得左！
食到口渴場內都有飲品賣，不過都係建議大家帶番支水啦，雖然場內買都唔係貴，但排排下隊想飲都得嘛。
真正落手既第一樣黎啦，見佢嘖哂煙咁盞鬼，雖則唔算便宜，但當玩下都開心既。
旁邊有個大電視播緊，話食到鼻都出煙咁過癮，當然要試一試啦！
睇真啲？原來係玉米條加左焦糖或巧克力醬姐～
既然booth上面大大隻字寫住相機食先，咁我都唔客氣啦～
其實朦朦地睇都幾似燒賣（偷笑）
成功啦～ 嗱嗱嗱，出哂煙咖！
講完似燒賣，轉個頭原來有真燒賣～
當然唔少得好鬼好食但又好鬼熱氣既港式小食啦！
身為台妹，見到芋圓點可以唔停低呢？芋圓豆腐花20蚊一碗，本身仲愁緊冇蓋拎走，點知靚女兼好人既姐姐幫我地諗左條橋，成功帶番屋企～
雞蛋仔、格仔餅當然亦唔少得！
仲有小鮮肉燒肉～
台灣小食花生冰淇淋，20蚊一舊，不過實係同係台灣食無得比（哭）
冰淇淋旁邊有大大桶號稱飲到2046的即調梳打～ 睇落都真係幾大桶咖，捱唔捱到去2046就唔知啦，但勝在嗌得落力！
隔離燒豬頸肉亦相當認真，仲有得試食～
另外仲買左呢個墨魚包飯（＄30）留去比家父宵夜，見佢燒得靚靚仔仔，加上上年好似冇見過，試下新野嘛～
薯塔（＄18），簡直係小朋友至愛，明明唔脆但睇佢食得個滋味樣，差啲呃到我！
香港手工啤酒【荔枝角】
最好玩應該係呢個Reverse Tap啦，自己放個杯上去，就會自動幫你斟滿～
有靚女姐姐斟杯比你試飲，試完再買都唔遲，支持下香港製造嘛！
圖就睇完，快啲約下朋友仔過黎青衣，搞旺個場佢，幫下小商戶啦～
0 Comments